Reperi Fero është arrestuar pas publikimit të pamjeve ku dhunon në mes të rrugës barbarisht një person.
Ngjarja ndodhi një ditë më parë (24 korrik) në Gjilan. Në videon e bërë virale reperi shihet duke goditur me grushte e shqelma një person në makinë, ndërsa disa persona ndërhyjnë për ta ndaluar.
Sipas policisë, është identifikuar si autori i sulmit Fero ashtu edhe personi i dhunuar.
“Prokuroria Themelore ne Gjilan, pas njoftimit që në media është duke qarkulluar një video incizim ku shihet një person duke e sulmuar një person tjetër në veturë, në qytetin e Gjilanit, menjëherë ka autorizuar Policinë e Kosovës -Hetuesit në Stacionin Policor në Gjilan, ku të njëjtit edhe e kanë bërë identifikimin e të dëmtuarit dhe të pandehurit, është ndaluar për 48-orë i pandehuri F.SH, me dyshimin e bazuar se i njëjti më datë 24.07.2022, ora 17h, ka kryer veprën penale, Sulm”, thuhet në njoftimin e policisë së Kosovës.
“Kush është këtu gangster”
Kjo nuk është hera e parë që Fero përfshihet në ngjarje të tilla. Në media janë publikuar disa video në periudha të ndryshme ku ai dhunon njerëzit, qoftë kalimtarë në rrugë.
Më 10 maj u publikua një video e tij teksa filmonte veten duke goditur një person.
Në video, Fero duket shumë i nervozuar teksa udhëton me makinë dhe i drejtohet disa njerëzve në rrugë: “Vëllai, a po e digjni me muzikë? A po dëgjohet vetëm Fero? Ju dua”.
Më pas shpërthen në fjalë banale që duket se i drejtohet Unikatil: “Jo si ju pederastë që fshiheni për 10-20 vite, s’më ha k*ri për famë, as për pare dhe as për kurrgjë.”
Del më pas nga mjeti dhe godet një person në rrugë duke iu drejtuar: “Kush është këtu vetëm 1 gangster, ëëë kush është vetëm një gangster?”
Ndërsa personi tjetër që godet i thotë: “Ik ore.”
Fero pasi e qëllon futet sërish në makinë dhe vazhdon të filmojë veten: “Ju që mendoni se jeni gangstera, iu pres të gjithëve, o fluturon një qen, ju shkeli”, teksa i jep gaz makinës.
