Këngëtari i famshëm, Liam Payne, ka ndërruar jetë pasi ra nga ballkoni i dhomës së tij të hotelit, nga kati i tretë në “CasaSur Palermo” në Bueno Aires, Argjentinë.
TMZ dha fillimisht lajmin duke informuar lexuesit se ish-ylli i “One Direction” kishte “sjellje të çrregullt” pak para se të vdiste. Veprimet e 31-vjeçarit tërhoqën vëmendjen e dukshme disa momente përpara rënies tragjike, pasi ai supozohet se theu laptopin e tij në holl dhe iu desh të transportohej në dhomë.
Pamjet nga dhoma e këngëtarit tregojnë një televizor të copëtuar, një substancë pluhur që besohet të jetë drogë dhe shumë sende të tjera, duke përfshirë qirinj, letër alumini, një enë sapuni Dove, një kuti me gaz të djegur, një çakmak, të shpërndara nëpër dhomë.
Sipas “Reuters”, policia u njoftua për një “burrë agresiv që mund të ishte nën efektet e drogës dhe alkoolit”.
Payne gjithashtu postoi në rrjetet e tij sociale para vdekjes së tij. Edhe pse tani i fshirë, në një nga postimet e tij, ai tregonte se po kalonte një “ditë të bukur” gjatë pushimit me të dashurën e tij, Kate Cassidy.
Kjo e fundit u kthye në Florida në fillim të kësaj jave, ndërsa Liam qëndroi pas. Udhëtimi i yllit të One Direction në Argjentinë filloi në fillim të këtij muaji ndërsa ai shkoi për të mbështetur shokun e tij të grupit, Niall Horan, i cili po performonte atje.
