Është shpesh e vështirë ta kuptosh kur je viktimë e manipulimit emocional, sidomos kur ndodh brenda një marrëdhënieje të ngushtë sepse ndodh pikërisht me ty. Por kur je spektator apo vëzhgues i situatës, shenjat janë shumë më të dukshme.
Nëse po e vë në pikëpyetje marrëdhënien tënde dhe dyshon për manipulim, më poshtë janë 10 shenja të qarta që, sipas ekspertes, tregojnë se po ndodh diçka e tillë:
1. Flet si aktor i një drame televizive
Një partner manipulues shpesh përdor fraza dramatike si: “Nga të gjithë njerëzit, mendova se ti do të më kuptoje” ose “Ti je i vetmi njeri që kam dashur ndonjëherë vërtet.” Kur këto shoqërohen me lot dhe emocionalizëm, për të të bërë të ndryshosh mendim, atëherë me shumë gjasë bëhet fjalë për manipulim emocional.
2. Ka gjithmonë lotët gati
Të gjithë mund të preken emocionalisht gjatë një debati, por nëse partneri yt qan shpesh në mënyrë të papritur apo të sforcuar, ndoshta po përdor lotët si mjet ndikimi për të të bërë të ndihesh fajtor apo për të fituar kontrollin mbi situatën.
3. Të largon nga njerëzit dhe ambientet që do
Manipuluesit emocionalë përpiqen të të shkëpusin nga rrethi yt i ngushtë – familja, miqtë apo ambientet që të japin ndjesi rehatie. Pyes veten: Sa shpesh dilni në vendet që ti do dhe ndihesh mirë? Apo gjithçka rrotullohet rreth preferencave të partnerit tënd? Nëse nuk ndihesh më në kontroll të jetës tënde, ky është një sinjal i qartë alarmi.
4. Pret që të reagosh vetëm në një mënyrë të caktuar
Në një marrëdhënie të shëndetshme, ekziston mirëkuptimi dhe pranimi i ndryshimeve. Por nëse ndjen që vetëm një lloj sjelljeje nga ana jote është e pranueshme për partnerin – ajo që e kënaq atë – atëherë ndoshta po humbet vetveten për të ruajtur “qetësinë”.
5. Kërkon vazhdimisht prova të dashurisë
Fraza si “Po të më doje, do ta bëje këtë për mua” apo “Nëse me do vërtet, do ma blije këtë” janë sinjale të qarta manipulimi. Dashuria e vërtetë nuk matet me favore apo dhurata. Kjo mënyrë sjelljeje përdor fajin si levë për të kontrolluar vendimet e tua.
6. Reagon keq kur dëgjon “jo”
Nëse çdo herë që thua “jo”, nis një debat apo acarim, kjo tregon mungesë respekti ndaj kufijve të tu. Siç thekson edhe Carey, “Dashuria dhe respekti nuk tregohen vetëm duke i bërë qejfin tjetrit. Marrëdhëniet ndërtohen nga kompromiset e ndërsjella.”
7. Nuk respekton kufijtë e tu
Nëse ti i ke vendosur kufijtë e tu dhe partneri i shkel qëllimisht, është momenti të reflektosh thellë për lidhjen. Kufijtë janë të nevojshëm për një marrëdhënie të shëndetshme dhe të ekuilibruar.
8. Të bën të ndihesh keq për vetveten
Kur ndihesh fajtor vetëm pse the një “jo”, vendose një kufi, apo u përfshive në diçka që të pëlqen, ndoshta partneri yt po të manipulon. Nëse të përmend vazhdimisht diçka nga e kaluara, vetëm për të fituar epërsinë në debate, kjo është një taktikë klasike e kontrollit emocional.
9. Luajnë rolin e viktimës
Pavarësisht se kush ka të drejtë, në çdo debat përfundon gjithmonë që tjetri del si “i lënduari”? Fraza si “Nuk mund të besoj që ma the këtë” apo “Si munde të më ofendosh?” janë mënyra për të shmangur përgjegjësinë dhe për ta zhvendosur fajin te ty.
10. Të nënçmon përmes “humorit”
Në fillim të duket si shaka, por nëse partneri bën shpesh komente tallëse apo përçmuese ndaj teje dhe kur reagon të thotë “Isha duke bërë shaka”, kjo është një mënyrë e maskuar e manipulimit. Në publik, këto “shaka” të bëjnë të dukesh i/e pasigurt dhe nëse kundërshton, del sikur po e prish atmosferën. Kjo është një strategji për të të bërë të dyshosh në vetvete, pa u dukur se ka bërë diçka të madhe.
