Presidenti i Miss Universe Tajlandë, Nawat Itzaragrisil, ka qarë live dhe kërkoi falje që e ka qortuar publikisht Miss Meksikën në një event që shkaktoi tërheqjen e pretendenteve të tjera për titullin, përfshirë fituesen e vitit 2024, Victoria Thilving.
“Unë jam njeri. Nuk kisha ndërmend ta bëja këtë”, tha drejtori i Miss Universe Tajlandë në një deklaratë të mërkurën.
Një burrë qëndronte pranë tij, me sa duket duke mbajtur shami letre për të fshirë lotët.
Duke folur më vonë në një event tjetër, Itzaragrisil kërkoi përsëri falje, duke iu drejtuar kandidateve të bukurisë që qëndronin pas tij.
Nuk kisha ndërmend të lëndoja askënd, sepse ju respektoj të gjithëve. Më vjen shumë keq që kjo ndodhi. Së pari, duhet t’u kërkoj falje kandidatëve. Nëse dikush është prekur dhe nuk është ndjerë rehat me atë që ka ndodhur, më vjen shumë keq”, tha zyrtari tajlandez.
Episodi që u bë viral
Incidenti i rëndë, i cili u transmetua drejtpërdrejt, filloi kur Nawat Itzaragrisil nisi të fliste për mungesën e Miss Meksikanes, Melissa Flores Bosch, në një set fotografik sponsorizimi.
Në video, Nahuat dëgjohet duke i kërkuar Miss Meksikës të ngrihet dhe të shpjegojë veten para kamerave.
Kur ajo u përgjigj, dukshëm e pakëndshme, se nuk donte të qortohej publikisht para kolegëve të saj, Nawat mori mikrofonin për ta ndërprerë dhe thuhet se e quajti “budallaqe”.
Më pas ai urdhëroi personelin e sigurisë të shoqëronte Miss Mexico jashtë hotelit pasi ajo këmbënguli të “përdorte zërin e saj”.
Megjithatë, ky veprim shkaktoi protesta nga kandidatet e tjera të Miss Universe të cilat u ngritën për t’u larguar nga eventi.
Ndër bukuroshet që u larguan ishte fituesja e konkursit të bukurisë 2024, Victoria Thilving, e cila u tha gazetarëve jashtë sallës:
“Kjo ka të bëjë me të drejtat e grave. Më vjen shumë keq, duhet të bëjmë diçka më të madhe. Ne i respektojmë të gjithë, por nuk duhet të merremi me gjëra të tilla”.
“Shkatërrimi i një vajze tjetër është përtej mungesës së respektit dhe nuk është diçka që kam bërë ndonjëherë. Kështu që po marr pallton time dhe po iki,” shtoi Thilving në një veprim që u përshkrua në mediat sociale si “akti më i fortë në historinë e Miss Universe”.
Të tjerë, megjithatë, e akuzuan mbajtësen daneze të titullit për thyerje të protokollit dhe prishje të një eventi zyrtar.
