Një roje sigurie nga hoteli luksoz “Intercontinental” dëshmoi së fundmi kundër reperit të njohur Sean “Diddy” Combs, duke zbuluar një skemë të fshehjes së një videoje sigurie nga viti 2016, në të cilën artisti shihet duke ushtruar dhunë fizike ndaj ish-partneres së tij, këngëtares Cassie Ventura.
Eddy Garcia, roja i sigurisë, deklaroi në gjykatë se Diddy i kishte paguar 100 mijë dollarë në para të gatshme në këmbim të dorëzimit të videos dhe për të siguruar që ajo të mos bëhej publike. “Ishte i tmerruar se ajo pamje do t’i shkatërronte karrierën,” dëshmoi Garcia për ABC News. “Kur më dorëzoi paratë, më tha se isha engjëlli i tij.”
Pamjet e videos shfaqen në sallën e gjyqit
Në seancën gjyqësore u transmetua videoja e shumëpërfolur, e cila tani është provë kyçe në procesin penal kundër Combs-it. Në pamje, reperi shihet duke ndjekur Cassie-n në korridorin e hotelit, duke e rrëzuar, goditur me shkelma dhe përpjekur ta tërheqë përsëri në dhomë
Avokatët pranojnë dhunën, por mohojnë akuzat penale më të rënda
Avokatët e Combs-it pranuan se videoja përmban dhunë, por mohuan kategorikisht akuzat për trafikim njerëzor, zhvatje dhe lidhje me prostitucionin, akuza të cilat kanë çuar në arrestimin e Combs.
Sipas dëshmisë së Garcias, Combs u përpoq me çdo kusht të kontrollonte shpërndarjen e videos. Ai u kontaktua fillimisht nga ndihmësja e reperit, Kristina Khorram, që kërkonte qasje në pamje. Më pas, vetë Diddy u përfshi drejtpërdrejt, duke e kontaktuar Garcian, i cili pranoi të dorëzonte një kopje të vetme të videos në USB në një adresë jashtë qytetit.
Të tjera dëshmi dhe akuza të rënda
Pas publikimit të videos nga CNN vitin e kaluar, Diddy kërkoi ndjesë publike, duke thënë se “ndiente keqardhje të sinqertë” dhe se kishte kërkuar ndihmë profesionale.
Në gjyq dëshmoi edhe ish-bashkëpunëtori i Diddy-t, Derek Ferguson, i cili u pyet rreth funksionimit të kompanive të reperit dhe përdorimit të tyre të mundshëm për qëllime të paligjshme. Ferguson mohoi të kishte dijeni për ndonjë krim konkret, por dëshmitë e tij i shtuan peshë pretendimeve të prokurorisë.
Gjithashtu u paraqitën dëshmi të punonjësve të tjerë, të cilët pranuan se blinin rregullisht produkte si lubrifikantë, drogë dhe alkool për ngjarjet e njohura si “freak offs”. Një tjetër detaj tronditës ishte një pagesë prej 20 mijë dollarësh nga nëna e Cassie-t, e cila kishte frikë për sigurinë e vajzës së saj.
Procesi vazhdon
Në ditët në vijim, priten dëshmitë e tjera kyçe, përfshirë atë të Bryana Bongolan, e cila pretendon se është kërcënuar me vdekje nga Combs, dhe një gruaje tjetër të njohur si “Jane”, e cila pritet të japë një dëshmi të gjatë dhe thelbësore.
Procesi gjyqësor vazhdon, ndërsa presioni publik dhe ligjor ndaj Diddy-t sa vjen e rritet. Nëse akuzat vërtetohen, reperi përballet me pasoja të rënda ligjore dhe dëme të parikuperueshme për karrierën e tij.
