Një studim i ri i publikuar nga Kolegji i Mjekësisë Baylor në npj Aging ka zbuluar se psilocibina, përbërësi psikoaktiv që gjendet në kërpudhat e ashtuquajtura “magjike”, mund të ketë efekte të fuqishme kundër plakjes qelizore.
Ndërkohë që më parë ishte studiuar kryesisht për efektet e saj në trajtimin e depresionit dhe ankthit, ky kërkim tregon për herë të parë se psilocibina ka ndikim pozitiv në trup, përtej sistemit nervor.
Sipas Dr. Louise Hecker, një nga autorët kryesorë të studimit, psilocibina ndihmon në ruajtjen e gjatësisë së telomereve – struktura mbrojtëse të kromozomeve që shkurtohen me kalimin e moshës – dhe në zgjatjen e jetëgjatësisë qelizore deri në 57%, në varësi të dozës së përdorur.
Studimet laboratorike treguan se metaboliti aktiv i saj, psilocina, redukton stresin oksidativ, përmirëson riparimin e ADN-së dhe rrit shprehjen e gjenit SIRT1, i njohur për rolin e tij në jetëgjatësinë dhe plakjen e shëndetshme.
Përveç rezultateve në nivel qelizor, kur psilocibina iu administrua brejtësve të moshuar, u përmirësua ndjeshëm mbijetesa dhe vitaliteti fizik, përfshirë përmirësime në cilësinë e qimeve, një tregues i drejtpërdrejtë i shëndetit të jashtëm.
“Ky është një zbulim emocionues që tregon se edhe kur ndërhyrja nis në moshë të avancuar, mund të ketë ndikim domethënës,” tha Dr. Kosuke Kato, bashkautor i studimit.
Shkencëtarët theksojnë se ende mbeten hapa të rëndësishëm përpara përdorimit klinik të psilocibinës, si përcaktimi i dozës optimale dhe vlerësimi i sigurisë afatgjatë. Megjithatë, këto rezultate hapin një perspektivë të re premtuese në luftën kundër plakjes dhe sëmundjeve të lidhura me moshën.
