Hetimet mbi vrasjen e 14-vjeçarit Martin Cani kanë zbardhur detaje të reja. Raportohet se akt-ekspertimi i thikës, e cila dyshohet të jetë përdorur në ngjarjen tragjike, ka identifikuar dy profile ADN-je. Një prej profileve përputhet me viktimën, Martin Cani, ndërsa profili i dytë përputhet me ADN-në e Lius Meçjas, i cili mbeti i plagosur gjatë incidentit.
Ngjarja e rëndë ndodhi mesditën e 18 tetorit, kur 14-vjeçari Martin Cani humbi jetën pasi u godit me thikë në bark nga bashkëmoshatari i tij, Mario Përlleshaj. Konflikti mes dy të miturve nisi në oborrin e shkollës 9-vjeçare “Fan Noli” dhe agravoi jashtë ambienteve të saj.
Pas goditjes, Cani u përpoq të kërkonte ndihmë, duke u drejtuar drejt shkollës, por humbi ndjenjat dhe u rrëzua në trotuar përballë saj. Ai ndërroi jetë në spital si pasojë e plagëve të marra.
Nga ky sherr mbeti i plagosur edhe shoku i ngushtë i viktimës, Lius Meçja, i cili nuk ndiqte të njëjtën shkollë, por stërvitej në të njëjtin klub futbolli me Martin Canin. Gjithashtu, vetë autori, Mario Përlleshaj, mori dëmtime në dorë gjatë përdorimit të thikës dhe u trajtua për disa ditë në një spital privat.
Policia dhe organet e drejtësisë vijojnë hetimet për zbardhjen e plotë të ngjarjes, ndërsa detajet e akt-ekspertimit pritet të luajnë një rol kyç në procesin gjyqësor kundër autorit.
