Lajmi kryesor i ditëve të fundit ka qenë: Sunny Hill Festival do organizohet në Tiranë këtë vit dhe jo në Prishtinë.
Prej vitesh i organizuar në kryeqytetin e Kosovës, festivali u bë i ditur se u anulua për shkak të vonesave në dhënien e pronës për shfrytëzim në Bërnicë. Në këtë situatë, Tirana do të jetë mikëpritsja e këtij eventi të rëndësishëm. Në një intervistë së fundmi për T7, Shapat Begolli, anëtar i ekipit administrativ të festivalit ka bërë me dije edhe lokacionin ekzakt, ku do të vendoset skena e madhe e “Sunny Hill”.
Ai tregoi se festivali do të zhvillohet në parkun pranë liqenit artificial. Organizatori Begolli ndër të tjera tregoi se ai është vendi i përshtatshëm dhe bashkia e Tiranës është zotuar që të marrë masat që festivali të mbahet aty.
“Është park, mirëpo atje është shumë më i madh sesa Gërmia. Si është kryer edicioni i vitit 2019, ne kemi kërkuar hapësirë të përshtatshme sepse festivali po rritej. Po të mbahej sot, Gërmia nuk do të na zinte”, është shprehur Begolli.
Ndonëse Shpati u shpreh se ai do të dëshironte të mbahej edhe në Prishtinë edhe në Tiranë.
Ju kujtojmë që lajmi për zhvillimin e Sunny Hill në Tiranë është konfirmuar fillimisht në faqen zyrtare të Festivalit në Instagram, ku shkruhej:
“E njëjtat data, e njëjta përvojë e bukur, vendndodhja e ndryshme!
Këtë gusht (për shkak të vonesave nga autoritetet në sigurimin e licencave të nevojshme për vendndodhjen), jemi të detyruar të shkojmë në Tiranë.
Ne duam të informojmë të gjithë ata që kanë blerë bileta se biletat e tyre janë të vlefshme për Sunny Hill Festival 2022 – Tirana Edition, ndërsa ata që nuk mund të marrin pjesë në Festivalin në Tiranë, do të mund të rimbursojnë biletat e tyre. (Dritarja e rimbursimit do të hapet nga 1 korriku deri më 15 korrik.
Më shumë detaje dhe udhëzime do të jepen në ditët në vijim.)
Tiranë,po vijmë!”
